Territoriales : Gilles Simeoni officialise sa candidature
Gilles Simeoni, u prisidenti di l’esecutivu, hà ufficializatu a so candidatura pà i tarrituriali.
Da primu rispunsevuli lla maiurità tarrituriali, dici ch’iddu hà avviatu un dialugu à l’internu.
« Aghju prupostu à i trè cumpunenti di custruì insemi, pà u primu ghjiru, un’ufferta pulitica fatta in a cuntinuvità di l’ingagiamenti presi davanti à i Corsi in u 2017 à nomu di Pà a Corsica, è chì piddessi in contu a nicissità d’assicurà a so effettività è a so missa in opara.
Issa pruposta s’arremba à sei punti :
1) A missa in anda di u nosciu prughjettu di sucità, è a difinizioni lli priurità llu mandatu à vena.
2) A vulintà d’apartura à ugni corsi, è à ugni forza viva chì u faci soiu, issu prughjettu.
3) A missa in anda di a trasmissioni, da ch’idda cresca a rispunsabilità in i levi novi d’eletti è di rispunsevuli pulitichi. Par quissa, una piazza più maiori devi essa fatta à a ghjuvantù, è ci vurria ancu à dà si a pussibilità di mudificà a cumpusizioni di l’esecutivu in cor’di mandatu.
4) Una guvirnanza chjara è dimucratica, rispittosa è primurosa di lialità trà membri di a stessa maiurità.
5) Una custruzzioni di lista è una spartera di rispunsabilità, ancu puri pà l’esecutivu, chì ùn sichini strinti da a logica di i partiti.
6) Ch’iddi sichini riaccirtati a paci è a dimucrazia da punteddi di a noscia andatura, è ch’idda sichi difinita una stratigia spartuta da purtà u statu francesu à rimetta a quistioni corsa in a so diminsioni storica.
Issi pruposti ùn sò stati accittati da u PNC, chì hà avviatu a so lista chì sò parichji sittimani, nè da Corsica Libara.
Ùn si n’hè mai pussutu parlà, fora di a maiurità, cù Cori in Fronti, chì issu muvimentu hà sceltu d’essa in a critica sistimatica di l’azzioni lla maiurità tarrituriali.
Piddu nota d’issi situazioni, è i rigretu » dici Gilles Simeoni chì cuntinivighja dindu « ch’idda tuccarà à ugni muvimentu naziunalistu di fà, s’iddu voli, a so parti lla strada è dicida di l’evuluzioni nicissarii da attivarì un’avvicinera ».
