SNCM: touchée, mais pas coulée
(A redazzioni d'Alta Frequenza) - Ùn si sarà aspittatu tantu, u guvernu hà riagitu arimani (vennari) dopu à a dicisioni di u tribunali di l’Unioni Aurupeu di righjittà u so appellu. Rammintemi chì u 2 di maghju scorsu, a cumissioni aurupea avia qualificatu d’aiutu di Statu i soldi virsati à a SNCM da a CTC pà u serviziu cumplementariu pà a DSP 2007 / 2013. Dapoi tandu, una vera rivolta s’era urganizata contr’à ssa dicisioni ch’ella sia ind’a cumpagnia marittima cà ind’i sferi i più alti di u Statu. S’è a SNCM duvaria rimbursà ssi 220 millioni d’auri ch’ella ùn duvia micca tuccà, sicondu l’istanzi aurupei è oramai sicondu a so corti di ghjustizia, u dilegatariu attuali saria guasgi in periculu di morti. Una dicisioni di ghjustizia chì sorti calchì ghjornu di un dibattitu impurtanti à l’assemblea di Corsica chì duvaria decida ghjustu appuntu quali sarà u novi dilegatariu. Ciò chì ùn inchieta tantu a SNCM è u cabinetu d’avucati chì hà assicuratu a so difesa. Jean Pierre Mignard hè unu d’elli. Ind’u ministeru di i Trasporti dinò, omu pari micca cusì inchietu. Un cumunicatu diffusatu arimani (vennari) priciseghja chì u guvernu hà presu cunniscenza di a dicisioni di ghjustizia ma aghjusta dinò chì ùn ci hè statu nulla di dicisu nant’à u fondu. Insisti dicendu chì l’aiuti dati à a SNCM erani bè in leia cù un bisognu veru di serviziu publicu è rammenta a determinazioni di Frédéric Cuvillier pà cuntinuà ad utilizà tutti i mezi ghjuridichi pà cuntistà ssa dicisioni di a cumissioni aurupea. Un affari chì ùn hè ancu à compia bella sicura.
Ecoutez Jean-Pierre Mignard, l’un des avocats de la SNCM.
