Le Direct

PPI transport : pas de développement des Chemins de Fer pour Sartène

(A redazzioni d'Alta Frequenza) - L'Assemblea di Corsica hà asaminatu ssu ghjovi un cartulari pisivu è difficiuli, quillu nant'à u Pianu Pluriannuali d'Investimentu di l'Infrastrutturi di Trasportu. S'hè parlatu dunqua di l'avvena è di l'evuluzioni di tutti ss'infrastrutturi, i porti, l'aeruporti, i stradi tarrituriali, o ancu dipartimintali, u caminu di farru, è a lista pudaria essa più longa. Senza entra di manera furmali inde u cartulari, si pò dì ch'ella c'hè stata un'ombra sopra u dibattitu. Un'ombra chì si priciseghja è chì s'avvicina : a nascita d'una cullittività unica. Ci voli à pricisà chì ssu prugramma di guasgi un milliardu è trè centu millioni d'auri si stindarà nant'à deci anni; sarà dunqua gistitu pà a maiò parti da a famosa cullittività unica. Appena à l'usu d'un cunsighju dipartimintali più putenti, ogni cunsighjeru tarrituriali, di tal cumuna maiò o cumunità di cumuni, o rughjonu, hà vulsutu difenda cù forza u so cartulari. S'hè parlatu dunqua di u portu di a Carbonita, di a penetranti d'Aiacciu, di i porti di Purtivechju è Prupià, di a travirsata d'Ulmetu, è torna quì a lista ùn hè micca cumpletta. Dominique Bucchini hà parlatu cù un trattu appena umuristicu di "l'apartheid" di u Sartinesi Valincu. In fatti, in u pianu di sviluppu di i Camini di Farru di a Corsica par asempiu, ùn hè mancu appena privistu di fà ghjunghja quissu quì fin'è Sartè.

Trattu umuristicu, ma podassi micca solu, eccu ciò ch'ellu dici l'anzianu presidenti di l'Assemblea di Corsica.