Manifestation de Bastia : les réactions politiques et étudiantes

Erani, issa duminica, più di 10 000 à avvinghja issi carrughji bastiacci par sustena à Yvan Colonna, dumandendu ghjustizia è virità, pà uttena a libarazioni lli prighjunera è fà senta a so vulintà di veda affaccà prestu un’evuluzioni stituziunali.

In capu lla filara, c’erani i principali sindicata studiantini. Rachel Reggeti, di a Ghjuvantù Indipindintista, dici ch’issa mubilisazioni maiori hè una vittoria, ma ùn hè una fini, chì fermani tanti cosi à uttena, com’è a libarazioni lli prighjuneri o ancu u fattu d’essa intesu da u statu francesu, senza avè ublicu sempri di ghjuvà si di a viulenza par fà si senta.

Steti à senta à Rachel Reggeti.

Pierre-François Filippi, à nomu di Ghjuvantù Paulina, dici chì a mubilisazioni ùn devi essa unicamenti quidda lli studianti, è chì i più anziani ùn devini essa daretu ad iddi, ma à torru ad iddi.

Steti lu à senta.

À tempu ghjunta a manifistazioni davanti à a prifittura llu Cismonti, 200 o 300 parsoni sò andati à pittughjà si à i forzi riprissivi.

Quissi chivi ani rispostu à i pitrati è i cocktail molotov cù tiri tesi di bombi lacrimatoghji, acciuncatoghji o di dispirsioni.
A dirizzioni lli finanzi hè stata tocca da un focu, è l’azzuffi sò durati sinu à un’ora avanzata lla sirintina.

Issi viulenzi, ùn ci era manera di sfrancà si ni, hà dittu Gilles Simeoni, postu chì u statu francesu hà chjusu i porti lli niguziati tutti iss’anni. Ma ùn pensa, u prisidenti di l’esecutivu, chì iss’avanzati ghjunti dopu à un sittimana d’azzuffi sichini un custatu di fiascu pà a famidda naziuanalista. Tocca à u statu francesu, oramai, à piddà tutti i so rispunsabilità.

Steti à senta à Gilles Simeoni.

Jean-Christophe Angelini faci u stessu custatu, par ciò chì tocca à issi viulenzi. A ghjuvantù, à senta lu, devi avè tutta a so piazza in u dibattitu puliticu, chì ùn devi essa cunfinatu à i soli partiti pulitichi. Jean-Christophe Angelini aspetta avali da gérald darmanin, u ministru di l’internu in carica llu cartulari lla Corsica, calchì attu forti.

Steti à senta à Jean-Chrsitophe Angelini.