Le Plan d'Aménagement et de Développement Durable au cœur de la session de l'Assemblée de Corse
(A redazzioni d'Alta Frequenza) - Hè dunqua oghji (ghjovi), à partasi di 3 ori forsa, chì l'Assemblea di Corsica studiarà u cartulari chì custituisci senza dubbitu alcunu u prughjettu numaru unu di a mandatura attuali, u Padd, u pianu d'accunciamentu è di sviluppu durevuli. Scelti da l'assemblea di Corsica di lugliu di u 2012, Maria Giudicelli è a so squadra ani travaghjatu assai pà rializà un affari chì paria fora d'accessu: dà à a Corsica un veru pianu di sviluppu chì pudaria racoglia una maghjurità chì li daria tutta a so lighjitimità. Dopu à l'assisi di u fundariu è di l'alloghju, di a muntagna è di u liturali, una nova paghjina impurtanti s'hà da ghjirà oghji cù l'aduzzioni guasgi sicura di un ducumentu direttori di primura. Emi dumandatu à Maria Giudicelli micca d'entra ind'u carattaru tennicu di un cartulari simuli, ma di dà ci piuttostu u so sintimu nant'à ssu ducumentu impurtanti.
Steti à senta à Maria Giudicelli.
