Football (Ligue 2) - Le SC Bastia reçoit Le Havre ce soir
(A redazzioni d’Alta Frequenza) - Pà a vintesima ghjurnata di Lega 2, u Sporting Club di Bastia, terzu, ricivarà pà un’uppusizioni di prima trinca Le Havre, seiesimu. Un sintimu di rivincita duvaria animà u cullettivu bastiacciu, chì avia persu 2-0 in cuntinenti, ma dinò u so allenatori Federicu Hantz, pà parechji raghjoni. Avresi chì fermani nant’à una seria di quattru scontri senza vittoria in Lega 2, è ancu puru s’è l’urgenza ùn si faci micca risenta, quissi quì t’avarani pà scopu di buscà à u minimu u risultatu à paru. U gruppu bastiacciu sarà u listessu cà quillu pà u spiazzamentu in Metz postu chì Maoulida sarà finalmenti quì, rimissu di un dulori à a coscia. Un scontru da principià à 8 ori à u Stadiu Armand Cesari. Da nutà chì u cullettivu di i famighji di vittimi di u 5 di maghju di u 1992 scuntrarà stamani u presidenti di Le Havre, Jean-Pierre Louvel, in quantu chì presidenti di l’unioni di i squadri prufessiunali da spiecà a dimarchja intrapresa da ùn ghjucà micca u 5 di maghju chì veni à l’uccasioni di i vinti anni di a catastrofa, iss’ultimu essendu par avà micca d’accordu.
