Football (coupe de la Ligue) - GFC Ajaccio - Vannes pour le premier tour
(A redazzioni d'Alta Frequenza) - A scelta à a sorti di u primu ghjiru di a cuppa di a Lega hè stata rializata issu dopu meziornu (marcuri) à a sedia di a Lega di Ballò Prufessiunali. Un ghjiru chì vidarà l'intrata ind'a cumpetizioni di 4 clubs di Naziunali è di i 20 furmazioni di Lega 2, frà i quali u GFC Aiacciu. È l'Aiaccini ricivarani dunqua a squadra Brittona di Vannes, ghjuchendu in Naziunali, u 7 o l'8 d'aostu. In casu di qualificazioni, i ghjucadori di Dumè Veilex scuntrarani o Arles-Avignon o Guigamp à u prossimu ghjiru, u 28 o u 29 d'aostu. I 14 squadri di Lega 1 micca qualificati pà una cuppa d'Auropa, com'è l'AC Aiacciu è u SC Bastia, ghjintrarani in ghjocu pà contu soiu à partasi di i sedicesimi di finali, à a fin di u mesi di sittembri.
