Autonomie : Six contributions en débat

Una ghjurnata longa quant’è maghju, quattru cuntribuzioni ghjunti à aghjustà si à u raportu llu prisidenti di l’esecutivu : eccu u prugrama di a sissioni spiciali di l’assemblea corsa didicata à l’autunumia.

À nomu di a maiurità tarrituriali, a prisidenti Marie-Antoinette Maupertuis hà dittu chì a Corsica t’avia oghji un appuntamentu cù u so avvena.

Hà spiicatu chì l’autunumia vali criscenza, spannamentu è sviluppu.

Ma issu prughjettu, tocca à a maior’parti à sparta lu, è in priurità à i naziunalisti.
Marie-Antoinette Maupertuis ni chjama dunqua à una maiurità allargata, in ghjiru à u ducumentu prisintatu da l’esecutivu.
Steti la à senta.

U gruppu di dritta, cacciatu Pierre Ghionga, hà ripitutu a so vulintà d’adattà a legi, micca di fà la. Tandu, Jean-Félix Acquaviva hà vulsutu fà a dimustrazioni chì issu puteri c’era dighjà, è ch’iddu ùn era efficaci.
U diputatu hà vulsutu piddà esempii cuncreti, da ghjustificà a nicissità d’un’autunumia lighjislativa.
Steti lu à senta.

Jean-Christophe Angelini a sparti, issa vulintà d’autunumia lighjislativa, ma dici ch’idd’ùn ci voli à firmà si quì.

L’elettu Avanzemu vurria ch’iddi sichini dati u quadru è u titulu.

Ci voli ancu à avanzà à nantu à i cartulari cuncreti, hà dittu Jean-Christophe Angelini, chì hà mintuvatu in a so cuntribuzioni l’autunumia è a bastanza finanziaria.

Avanzemu avvia dunqua una pruposta di titulu, un andà versu una legi urganica, un rifarendu, è i pruposti di scelti pulitichi par ciò chì tocca à a lingua è u populu.
Steti lu à senta.

Valérie Bozzi, à nomu di a dritta, si hè ditta impinsirita sempri chì l’autunumia faccia, à curtu o mediu andà, strada à a indipindenza.

Ancu puri ch’idda volga un’evuluzioni custituziunali da ch’iddu fermi impressu à veru u puteri d’adattazioni, ricusa d’accittà un’autunumia lighjislativa.
Steti la à senta.

Cori in Fronti hà liatu à so cuntribuzioni à issi trè punti : Tarra- Lingua – Populu.
Voli co custruì, u gruppu, un pattu di paci.

Ùn fà uffesa à a mimoria è ghjunghja ni à un scrittu cumunu validatu da tutti i naziunalisti à l’escia d’issa sissioni spiciali : eccu u sensu di u intarventu, marti matina, di Paul Quastana.

Ancu puri ch’idda sichi vana di circà cunvirgenza cù u gruppu di dritta, i naziunalisti si devini à tutti conti ritruvà via un fundu puliticu cumunu, chì sidinò pà a Corsica, una volta di più, saria faltatu u colpu.
Cori in Fronti brama u puteri lighjislativu, ma cù un periudu transitoriu di trasfirimentu lli cumpitenzi, par certi duminii.
Steti à senta à Paul Quastana.

Josepha Giacometti hà dittu ch’idd’ùn era à u statu di fà si maestru di u tempu.
A cunsigliera di Corsica Libara hà vulsutu metta bè in risaltu i nuzioni di citadinanza è di populu.
Steti la à senta.

Pierre Ghionga, infini, hà prisintatu una cuntribuzioni parsunali. 

Iddu vurria l’evuluzioni lighjislativa, ma in u quadru strintu di a ripublica, è senza a pussibilità d’avvià si versu a indipindenza.
Steti lu à senta.