Augmentation des cas d'Hépatites E : la charcuterie montrée du doigt
(A ridazzioni d'Alta Frequenza) -Dici unu studiu llu Biglittinu Epidemiulogicu, publicatu iss’ultimi ghjorna, chì i diagnostichi d’epatita E, liati à a cunsumazioni llu fecatu llu purceddu, sò crisciuti è bè iss’ultimi anni in francia, masimu in u meziornu è in Corsica. Di fatti, s’idd’ùn sò chè 9 i casi cuntabilizati pà u 2002, sò cuddati à 2292 pà u 2016. I loca i più tocchi sò a righjoni PACA, a Corsica è l’Uccitania. A causa, ni saria u rigimu alimintariu d’issi loca. U situ « Santé Publique France » spieca chì, pà a cuntaminazioni, hè suspittata, pà u più, a cunsumazioni di salcicci di fecatu di porcu crudu. Laurence Coquerel, dirittrici di ricirca à u CNRS, metti in causa in u ghjurnali « 20 minutes » l’usi lla tola, postu chì « parichji prudutti lucali sò fatti cù fecatu di porcu crudu o cottu pocu, com’è u ficateddu, o i salcicci di porcu tipichi d’altri righjioni miridiunali ». L’epatita E tocca ugni annu circa 20 milliona di parsoni in u mondu. 44000 morti sò stati cuntabilizati in u 2015, à senta à l’Urganisazioni Mundiali lla Saluta (OMS)
Sur le même sujet
