Banderole de Furiani : nombreuses réactions politiques
(A redazzioni d'Alta Frequenza) - Dopu chì i sustenidori di u SC Bastia avissini mustratu un striscionu in Furiani ssu sabbatu contr'à a ghjurnalista di Corse Matin Hélène Romani, ci sò stati parechji riazzioni. Pà u merri di Bastia Gilles Simeoni, « u striscionu stesu à u stadiu duranti a partita trà Bastia è Lens contr'à Hélène Romani hè lamentevuli. Ùn si pò micca u dirittu di scriva ciò chì hè statu vistu à u stadiu sabbatu. Prima parchì u parallelu chì hè statu fattu cù mumenti neri di a Storia hè indecenti. Dopu parchì a libertà di a stampa è a libertà di sprissioni sò libertà fundamintali. Infini parchì insultà di manera publica una donna hè propiu un scandalu, soprattuttu in una sucità isulana induva i famighji è i chjerchji di sulidarità sò propiu liati ». Pà u presidenti di l’Esecutivu Paul Giacobbi, « atti simuli, soprattuttu in un locu spurtivu, ùn poni essa accittati. Ùn ci hè nulla chì pudissi ghjustificà, è ancu di menu spiegà, di tuccà a dignità di una parsona ». « Aldilà di a maldicenza contr’à una prufiziunali di a stampa, ùn si pò accittà chì a maghjina di a Cullittività Tarriuriali di Corsica sighi stata assuciata à ssa dimustrazioni patetica ! » Pà u Partitu di a Nazioni Corsa, « insultendu davanti à millai di spettatori l’onori di una donna è dinò quillu di una famighja corsa, ss’uffesi creani un rimusciu maiò. À quali pò apprufittà ssu rimusciu ? Nè à u club è à i so sustenidori, è ancu di menu à a Corsica ». « Hè par quissa chì u PNC lampa una chjama pà ritruvà subbitu a strada di u dialogu ». Pà u presidenti di a CAB François Tatti, « l’attu è i rifarenzi à fatti storichi chì rilevani di l’odiu, ùn poni micca essa accittati. Pocu impremini i mutivi di scuntintezza, ùn ci hè nulla chì pudissi ghjustificà un disprezzu simuli pà una donna è un’uffesa simuli contr’à u rispettu u più elementariu di a libertà di a stampa ». « A me prima riazzioni hè stata quilla di fà cunnoscia a me cuntistazioni ind’è i dirighjenti è d'andammini subbitu da u stadiu ». Infini pà u presidenti di l’ADEC Jean Zuccarelli, « ùn hè micca pussibuli d’offenda senza punizioni parsoni parchì c’hè un disaccordu par via di un articulu di stampa o di una dicisioni di ghjustizia. Si tratta quì di pratichi chì sò un scandalu è chì ùn poni micca essa accittati in un locu spurtivu è propiu luntanu da u spiritu di a festa di u sport. Lampà uffesi numinativi cù rifarenzi disgustevuli contr’à dui donni di rispettu, chì facini u mistieru di ghjurnalista è di direttrici dipartimintali di a securità, custituisci una minaccia pà tutta a sucità corsa ».
