Xylella Fastidiosa : les mesures préventives de l'Etat en Corse
(A redazzioni d'Alta Frequenza) - I servizi di u Statu ani dicisu di mubilizassi cuncirnendu u cartulari di u batteriu Xylella Fastidiosa chì sterpa parechji spezii vegetali in Italia suttana, è chì minaccia di sparghjasi. In fatti, i prifetti di Corsica Suttana è Suprana ani publicatu un arrestu prifitturali par omu, cù parechji misuri di privenzioni chì s'appiecarani à a circulazioni di i vegetali in Corsica. Di fattu, l'intruduzzioni di vegetali chì venini o chì sò passati pà i lochi cunsidarati com'è tocchi da a Xylella Fastidiosa o inghjirendu ssi zoni infettati hè pruibita in Corsica. Duranti cuntrolli dumandati da i servizi di u Statu, tutti i vegetali suspitatti d'essa cuntaminati, senza passaportu fitosanitariu aurupeu o chì ùn ghjunghjini micca da un stabilimentu scrittu in u rigistru uffuciali di u cuntrollu fitosanitariu sarà isulatu è cunsignatu, à a carica di quillu chì i teni, da i servizi di spizzioni chì rializarani prilevamenti pà analisi. Hè dinò difesu à tutti i parsoni d'offra à a vendita vegetali usendu, inde cundizioni micca regulari, u duminiu di u Statu, di i cullittività lucali è di i so stabilimenti publichi. Infini, i cumpagnii marittimi è aerei chì facini i viaghji versu a Corsica facini sapè, annant'à i so battelli è avviò è u so situ di riservazioni annant'à a tela, à i so passaghjeri i risichi annant'à a saluta liati à l'intruduzzioni d'urganisimi nucevuli da u trasportu di vegetali, grazia à affissi d'infurmazioni à a so dispuzioni; affissi chì sò dati dinò à quilli chì rivendini vegetali pà l'infurmazioni di i so clienti.
