Vers un nouveau revers judiciaire pour la SNCM?
(A redazzioni d'Alta Frequenza) - L'avucatu ghjinirali di a Corti di ghjustizia di l'Unioni aurupea, Melchior Wathelet, hà prupostu ind'i so cunclusioni resi oghji (marcuri) di righjittà u ricorsu postu da a SNCM pà ciò chì tocca un arrestu contr'à ella prununziatu di sittembri di u 2012 da u Tribunali aurupeu. Chersu da a Corsica Ferries, u Tribunali aurupeu avia annulatu, di sittembri scorsu, una dicisioni di a Cumissioni aurupea chì avia validatu aiuti accurdati da a Francia à a SNCM in u 2002, eppo duranti a so privatisazioni in u 2006. U tribunali avia stimatu chì quissi quì erani aiuti di Statu micca legali è ch'elli duviani dunqua essa rimbursati. Sustinuta da u Statu francesi, a SNCM dumandava l'annulazioni di ssa dicisioni. Melchior Wathelet hà righjittatu a dumanda di a SNCM. Hà prupostu dunqua à a Corti di "righjittà i ricorsi" è di "cundannà a Sucità naziunali marittima Corsica Mediterraniu è a Republica francesi ad assuma i so propii spesi di ghjustizia è quilli sposti da Corsica Ferries France à parti uguali". S'è a corti suvita i cunclusioni di u so avucatu ghjinirali, saria un novu colpu gattivu pà a cumpagnia.
