Trente-deux ans après, le collectif des victimes de la catastrophe de Furiani veut perpétuer le souvenir
U cinqui di maghju, ani da fà trenta dui anni ch’iddu hè successu u drama di Furiani : 19 morti, 2 300 ferti, è tanti parsoni, corsi o cuntinintali, marcati dirittamenti o indirittamenti da issa tribuna sfraiata, fatta à pezzi è à bucconi par accodda ghjenti più ch’idd’ùn si ni pudia riceva !
Da mantena issu ricordu, u cullittivu di i vittimi è l’associu Sporting Bastia 92 di i ghjucadori di tandu ani da urganizà parichji azzioni.
Ghjovi, 200 cullighjanti ghjunti da ottu culleghja ani da andà à u stadiu pà una ghjurnata di tramandera in prisenza di u cullittivu, di l’anziani ghjucadori, è di i ghjurnalisti prisenti quidda sera.
U trè di maghju, quiddi chì ani midicatu i tanti vittimi ani da parlà d’issa trista spirienza à l’auditoriu di u museu di Bastia, in prisenza di u dissinatori Plantu.
Sabbatu u quattru di maghju, squadri di ghjovani ghjunti da tutta a Corsica è anziani di u SC Bastia, di u GFCA, di u Sporting di u 1992 è di Montpellier s’ani da ritruvà in ghustra à nantu à i stadii d’Erbaghjolu è Vulpaghju, in Furiani.
U cinqui di maghju, com’è ugni annu, ci sarani i soliti cirimonii da unurà a mimoria d’issu ghjornu.
Tramandà hè una primura maiori di u Cullittivu, chì si filicitighja di sapè chì a squadra di Marseglia hà da cunsacrà un locu apposta à u ricordu d’issu drama, trà uni pochi d’altri azzioni privisti in a cità fuceana.
Steti à senta à Josepha Guidicelli, a prisidenti di u Cullittivu.
