Territoriales : Emmanuelle de Gentili veut incarner un socialisme progressiste
(A redazzioni d'Alta Frequenza) - I dichjarazioni di candidatura cuntinueghjani à manca. Dopu à François Tatti, u ticchettu Jean Zuccarelli - François Casasoprana, Dominique Bucchini pà u Front de Gauche è in una certa misura Jean François Baccarelli cù una dimarchja eculugista, hè Emmanuelle de Gentili chì hà lanciatu a so dimarchja ssa dumenica in Pedicroce. U sughjettu di u numaru unu di a lista essendu par avà sicundariu d'appressu à ella, hà circatu prima duranti ssu ripastu è dibattitu à rinfurzà i rilazioni trà sucialisti di u Cismonti è di u Pumonti, postu chì s'è a so dimarchja hè una dimarchja d'apartura à manca è di manera più larga à i prugressisti chì si ritrovani in u so discorsu, si lanciarà di manera chjara cù u culori di u Partitu Sucialistu. S'è u mondu pà una dumenica à meziornu di lugliu inde l'internu hà surpresu in bè, ancu l'eletta, dui assenti pariani guasgi impurtanti quant'è quilli prisenti, vali à dì Jean Charles Orsucci è Jean Louis Luciani, chì ani prifiritu piuttostu i so lochi rispittivi à u caldu di Pedicroce, o di manera più simplici pà dimustrà a so diffarenza di pettu à a dimarchja lanciata da quilla da quali sò vicini à l'Assemblea di Corsica. U prublema di a strategia di u sicondu ghjiru si poni dinò, quandu si sà i rilazioni cumplicati trà Emmanuelle de Gentili è u presidenti di l'Esecutivu, Paul Giacobbi, ss'ultimi mesi, senza mancu parlà di i raporti difficiuli trà ss'ultimu è Hyacinthe Mattei, sustegnu di a prima ora d'Emmanuelle de Gentili.
Steti à senta à Emmanuelle de Gentili.
