Sommes-nous tous fichés ?
(A redazzioni d'Alta Frequenza) - Semi tutti archiviati ? A dumanda pò essa posta dopu a publicazioni di un dicretu in u Ghjurnali ufficiali mentri u ponti di i Santi. Quissu quì autorizeghja in fatti a criazioni di un trattamentu cumunu à i passaporti è à i carti naziunali d'identità di i dati à carattaru parsunali. Una misura chì cuncerna 60 millioni di francesi, vali à dì guasgi tutti, chì u guvernu ghjustificheghja da una vulintà di simplificazioni amministrativa pà una dumanda di passaportu o di carta d'identità in casa cumuna. Una banca di dati unica, un cartulari chì si chjamarà TES, tituli elettronichi securizati, è chì duvaria racoglia da quì à pocu infurmazioni com'è u ritrattu numerizatu di a faccia, i stampi digitali, u culori di l'ochji o ancu l'indirizzi fisichi è numerichi. Quilli chì duvariani avè accessu à ssi dati sò a pulizza è a gendarmeria, ma dinò i dugani è i servizi di rinsignamentu, eppo sottu à certi cundizioni Interpol o u sistema Schengen. Pà l'anzianu raprisintanti di l'Ordini di l'avucati l'Aiacciu, Dumè Ferrari, hè un attaccu veru contr'à i diritti di l'Omu di manera generali. Una situazioni chì l'inchieta propiu, soprattuttu cuncirnendu a Corsica, chì d'appressu à ellu, hè sempri stata un tarrenu di prima scelta pà ssu gennaru di cumpurtamentu.
Steti à senta à Dumè Ferrari.
Sur le même sujet
