SNCM: le ciel s'assombrit un peu plus
(A redazzioni d'Alta Frequenza) - Una gattiva nutizia ùn ghjunghji mai sola, a prova si n'hè cù a SNCM chì hà cunnisciutu oghji un colpu pessimu novu chì duvaria fà mali. In fatti, u gruppu nurvegianu Siem ùn hè più candidatu à a ripresa di a cumpagnia SNCM com'è no a pudiami pinsà dopu à u cunsighju di survighjenza di luni. U gruppu hà dittu ch'ellu era statu surpresu da a dicisioni di ssu cunsighju chì hà vutatu contr'à a prulungazioni di u mandatu di Marc Dufour à a presidenza di u direttoriu. Ssa cunfidenza micca rinnuvata da l'azziunarii à u dirighjenti u più impurtanti lampa di fattu à caternu u prughjettu di rilancia pinsatu da quissu quì. In a perspettiva di ssu pianu di rilancia, Marc Dufour s'era avvicinatu da u gruppu nurvegianu chì avaria pussutu arricà u finanziamentu nicissariu pà cumprà battelli novi. Oghji, a Cumissioni Aurupea hà rammintatu chì a Francia t'hà sempri l'ubligazioni di fà si rimbursà i 440 millioni d'auri d'aiuti publichi micca legali tocchi da a SNCM. Sicondu a Cumissioni Aurupea, si tratta di "soldi chì ùn duviani micca essa stati tocchi ind'u quadru di a Dilegazioni di Serviziu Publicu 2007-2013" cunsidarati dunqua da a cumissioni com'è essendu suvvenzioni, "è da un'antra banda, aiuti ricivuti ind'u quadru di a privatisazioni è di a strutturazioni nova di a SNCM".
Sur le même sujet
