Procès en appel des gîtes ruraux : Paul Giacobbi charge son cabinet de l'époque
(A redazzioni d'Alta Frequenza) - Hè ssu marcuri da mani chì, duranti u prucessu in appellu in Bastia di l'affari dittu di l'alloghji campagnoli, Paul Giacobbi, presidenti di u cunsighju generali di Corsica Suprana à l'epica di i fatti, hà datu a so virsioni di i fatti è u so parè. È si pò dì ch'ellu ùn s'hè micca fattu prigà. Torna una volta, hè l'assenti maiò di ssu prucessu, Jean Leccia, tombu di marzu di u 2014, chì hà avutu un rollu cintrali inde i dichjarazioni di Paul Giacobbi. D'appressu à ellu, Jean Leccia pudia piattà affari, parlendu ancu di "tradimentu" di pettu à ellu. Un tradimentu dinò da a parti di u so cabinettu sicondu i so detti, postu ch'ellu hà dittu ch'ellu "gnurava" ciò chì era accadutu, qualifichendu i fatti di "scruccunaria" è "d'arrubeci", un cambiementu veru di strategia di difesa di pettu à quilla di u prima prucessu, postu chì l'anzianu presidenti di u cunsighju generali hà incausatu di manera chjara è putenti à Dominique Domarchi è Augustin Viola. Dinò, Paul Giacobbi hà dittu chì s'ellu ùn hà micca cunnisciutu prissioni di u so cabinettu, Dominique Domarchi è Augustin Viola "aviani una parti di u puteri d'iniziativa" nant'à u bughjettu di l'aiuti è di i suvvenzioni. Incalchendu nant'à i so assenzi ripituti par via di u so mandatu di diputatu, Paul Giacobbi hà miss in evidenza u fattu ch'ellu dilegava assai è chì i cartulari di l'alloghji campagnoli ùn erani micca inde u so perimetru. D'appressu à ellu, i so cunsighjeri l'ani traditu, "ani abusatu di [a so] cunfidenza" è l'ani "mancatu" par "intaressu parsunali". Par avà, Paul Giacobbi rispondi à i dumandi di l'avucata generali, di a parti civili è di a difesa.
