Le Direct

Pourvoi en cassation d'Yvan Colonna : décision imminente

(A redazzioni d'Alta Frequenza) - A dicisioni di a Corti di Cassazioni nant'à l'appellu postu da l'avucati d'Yvan Colonna hà da cascà da quì à pocu. Un appellu da sciappà l'ultimu prucessu nant'à l'assassiniu di u prifettu Claude Erignac, di farraghju di u 1998 in Aiacciu. Me Patrice Spinosi, hà missu in avanti à a fini di u mesi scorsu davanti à a corti trè punti di u prucessu in appellu di u so clienti. Prima, a missa à palesu di membri di u "commando Erignac" duranti i guardi custodii, dopu a lettara data duranti l'audienza chì ghjunghjia, à ciò chì omu dicia, d'Yvan Colonna adirizzata à Pierre Alessandri, è infini u fattu chì i corti d'assisi spiciali pighjessini a so dicisioni via una maghjurità più chjuca di pettu à i corti d'assisi classichi. S'è un prucessu ùn duvia micca essa sciappatu, tandu i cunsighji di iss'ultimu si ghjirariani ver di a Corti Aurupea di i Diritti di l'Omi da uttena una cundanna di a Francia.