Petite amélioration de la situation du marché du travail en Corse en 2016
(A redazzioni d'Alta Frequenza) - A situazioni di u marcatu di l'impiegu s'hè migliurata in u 2016 in Corsica cù menu parsoni in cerca d'un impiegu di pettu à u 2015 ! Hè stata scritta di manera chjara nant'à i ducumenti dati mentri a cunfarenza di stampa ssu marti di a Direccte di Corsica è di a direzzioni regiunali di Pôle Emploi. C'hè statu l'annu scorsu di fattu una rumpitura dopu à ottu anni di fila di crescita. Un "meghju" chì apprufitta soprattuttu à i ghjovani (-8,2% nant'à un annu pà i ghjovani senza attività, -7,3% pà quilli cù un'attività ridutta) è à quilli chì cercani un impiegu dipoi un pezzu (-8% nant'à un annu, vali à dì 600 parsoni in cerca d'un impiegu in menu). A situazioni ferma difficiuli inveci pà i seniors, cù +7,2% nant'à un annu, vali à dì 330 parsoni in più circhendu un impiegu in ssa categuria d'età. Si custata dinò sfarenzi forti trà i dui dipartimenti, parchì s'è no emi arrighjistratu in Corsica Suprana 660 disimpiegati di menu nant'à un annu (-6,6%), a Corsica Suttana cunnosci pà contu soiu l'effettu cuntrariu cù 275 disimpiegati in più (+3,3%). Ultimu elemenu ch'è no pudemi rimarcà : a crescita di l'impiegati ditti staccati, ghjunti da u stragneru, 3 200 nant'à tutta l'annata 2016, frà i quali i trè quarti intarvenini in Corsica Suttana, cù 70% di quissi quì in u settori di i custruzzioni. Malgradu sciffri cuntrastati, u direttori regiunali di Pôle Emploi hè cuntentu, senza essa quantunqua ottimistu è beatu.
Steti à senta à Pierre Péladan.
Sur le même sujet
