Municipales à Bastia : le PNC passe à l'offensive contre Pierre Savelli en conviant ses principaux opposants à une réunion publique

Sabbatu in Bastia, l’uppusizioni bedda chjara di u PNC è di Jean-Christophe Angelini à Gilles Simeoni è à Femu a Corsica si hè avviata à nantu à un altru tarrenu. U partitu autunumistu hà fattu una riunioni publica ind’iddi sò ghjunti dicini di parsoni, è hà marcatu cusì u principiu di u so pusiziunamentu in l’uppusizioni pà i muncipali bastiacci.

Bastia hè par avali una cità ind’iddu hè pocu prisenti u PNC, è u partitu ùn si ni pò cuntintà chì, com’iddu a dici Jean-Christophe Angelini, a Corsica ùn si ferma à i porti di Portivechju, Sartè o Prupià.

U disaccordu prufundu cù a pulitica avviata à a CdC curri sinu à a municipalità bastiaccia, spieca Jean-Christophe Angelini chì hà criticatu i scelti – è ancu i non scelti – pà i cartulari com’è quiddu di u portu di a Carbunita o quiddu di u pianu lucali d’urbanismu.

Era beddu diversu u publicu à issa riunioni. Parichji uppunenti à Pierre Savelli, è chì ùn sò di cori naziunalistu, erani chivi : Julien Morganti, Jean-Sébastien de Casalta, Frédéric Poletti o ancu uni pochi di parsoni chì di regula viaghjani cù François Tatti o Jean Zuccarelli.

Mancaia solu à issa riunioni u candidatu dichjaratu di dritta, Sylvain Fanti.

Si trattarà dunqua di fà fronti tutti insemi contru à Simeoni è Savelli ?

Steti à senta a risposta di Jean-Christophe Angelini.

Trà i prisenti c’era dunqua Julien Morganti, cù u so sicondu Didier Franceschi è parichji militanti di « Un Futur pour Bastia ». U candidatu, dichjaratu da quand’hè pà issi municipali di Bastia è cunsiglieri municipali d’uppusizioni, dici chì a so prisenza viaghja logica cù a so dimarchja di discussioni attaccati cù tuttu l’uppusizioni, municipali è tarrituriali.

Pari ch’iddu ùn disturbi à Julien Morganti, u culori naziunalistu di u PNC. Eppuri hè luntanu è bè d’iss’idea pulitica.

Steti lu à senta.

Cori in Fronti hà fattu un’affaccata à issa riunioni. U partitu sparti cù u PNC u custatu di a nicissità d’un rinovu municipali in Bastia.

Ma, via Gérard Dykstra è Battì Lucciardi, hà dittu di manera bedda chjara chì certi punti ùn li francaria : mancu à pinsà la à attaccà a battaglia di i municipali cù i forzi anti naziunalisti, ch’iddi sichini di dritta o di manca.

Cori in Fronti conta di fà la, issa campagna d’uppusizioni, ma tinindu si ni à issi cundizioni soi.

Steti à senta à Gérard Dykstra.