Municipales à Bastia : Julien Morganti chef de file d'une union partielle de l'opposition municipale
Sabbatu in Bastia, a campagna pà i municipali si hè avviata à veru, cù a prisintazioni di a dimarchja Uniti, purtata da Julien Morganti.
C’erani circa dui centu parsoni par scopra issa dimarchja ind’iddi si ritrovani Jean-Sébastien de Casalta, Sylvain Fanti, u MCD di François Tatti è u PNC. Mezu à l’aienti, c’erani ancu Jean-Christophe Angelini, u diputatu Paul-André Colombani, è ancu u cunsiglieri tarrituriali di dritta Jean-Michel Savelli, frateddu di u merri Pierre Savelli.
Ùn c’erani – ma quissa era privista – nè Jean Zuccarelli, nè Jean-Martin Mondoloni, nè u Partitu Radicali di Manca, nè mancu infini u Partitu Cumunistu. Issu uppusizioni hè larga dunqua, ma incumpletta quantunca.
Issa quistioni, ùn l’hà vulsuta trattà Julien Morganti, cuntintendu si di criticà l’attuali maiurità, chì à senta lu si laca à Bastia sclassificata è brutta. U capifila d’Uniti si voli attaccà à u cartulari suciali, ma ancu a quiddu lla lutta contru à a insicurità è i cumunitarismi.
Andendu à punghja à Gilles Simeoni, postu ch’idda curri a voci ch’iddu saria capilista pà a maiurità, l’accerta Julien Morganti : hà da essa iddu u merri di Bastia s’idda vinci a so lista.
Steti lu à senta.
Julien Morganti avia dittu, in u 2020, chì a dimarchja d’unioni di trè uppusizioni pà u sicondu ghjiru ùn avia chè valori di rivincita. Jean-Sébastien de Casalta, chì n’era tandu à l’urigina, l’hà scantati issi picculi cosi, chì vol’dà a priurità à issa dimarchja d’unioni di primu ghjiru.
Hà scantatu supr’à tuttu i missi in causi di Jean Zuccarelli, chì u vol’fà rispunsevuli di u fiascu d’una dimarchja d’unioni cumpletta. A so missa in ritiru, à senta lu, ùn hè liata à a so missa in asaminu, chì curri sempri, pà un suspettu di froda alitturali in u 2020.
Steti à senta à Jean-Sébastien de Casalta.
Mathieu Ricci, un ghjovanu militanti, hà riprisintatu u partitu autunumistu. Par certi, iss’ingagiamentu di u PNC hè in u filu logicu di a « guerra » trà Jean-Christophe Angelini è Gilles Simeoni.
Ma par Mathieu Ricci, vulè tarriturializà iss’alizzioni – ancu puri ch’idda sichi quissa a brama di François Tatti - saria unu sbagliu. Ùn hà dittu tanti affari Mathieu Ricci, trattendu si di quiddi chì ùn sò d’iss’unioni. Ma hà quantunca rimpruvaratu à a municipalità d’essa cliintilista.
Steti lu à senta.
Sylvain Fanti, riprisintanti à pena solu di a dritta, voli purtà, via issa lista, u pinseri lla sicurità, in cunfurmità cù a so sinsibilità pulitica.
Steti lu à senta.
Par Marie-Claire Poggi, chì hà da riprisintà, cù uni pochi d’altri, u MCD di François Tatti à nantu à a lista Uniti, i cartulari suciali ani da essa una primura maiori.
Steti la à senta.
