Municipales 2014 à Bastia : Gilles Simeoni présente son projet
(A redazzioni d'Alta Frequenza) - Gilles Simeoni hà prisintatu ssu sabbatu ind’u museu di Bastia u prughjettu d’Inseme per Bastia pà i municipali 2014. Un prughjettu chì s’hè custruitu inghjiru à quattru assi. L’assu cintrali hè quillu di a demucrazia, quissu quì avendu dinunziatu i metudi di a municipalità attuali ind’u duminiu di l’attribuzioni d’alloghji suciali, di l’impiecu publicu è di i chjami à l’ufferti. Trè atri assi sò stati prisintati, quillu di a sulidarità, cù par asempiu una vulintà di rinfurzà l’azzioni suciali di vicinanza è a riabilitazioni sana sana di u parcu HLM chì asisti dighjà. Quillu di u sviluppu ecunomicu, cù a rinvivita di u cumerciu ind’u centru di a cità, novi piani di circulazioni è di staziunamentu o a voglia di fà di Bastia un polu turisticu. Ultimu assu, quillu di una cità identitaria, pà una cità à u primu rangu à u nivellu di a cuufficialità di a lingua corsa cù una pulitica culturali aparta ver di u Mediterraniu è u mondu, un’apartura chì si pudaria bè traducia à u nivellu puliticu, cù a prisenza à u primu pianu d’anziani omi di Pierre Chiarelli. Infini Gilles Simeoni, à mezu à fiacchini contr’à Jean Zuccarelli, chì porta d’appressu à ellu un prughjettu micca rialistu, hà criticatu a gistioni finanziaria di a cità è di a CAB, dicendu chì quissa quì ùn hè mancu appena cusì bona, à u cuntrariu di ciò ch’ella dici a maghjurità attuali, insistendu nant’à una debbita multiplicata da sei pà a CAB ss’ultimi anni, una carica fiscali in crescita è capacità d’investimentu assai debbuli senza passà pà suvvenzioni o imprestiti.
Steti à senta à Gilles Simeoni.
