Malgré des recours multiples devant la justice, le PADDUC reste debout
(A redazzioni d'Alta Frequenza) - Ghjuvanni Biancucci, u presidenti di l'Agenza d'accunciamentu durevuli, d'Urbanisimu è d'Energia di a Corsica, hà fattu ssu luni davanti à a stampa un puntu nant'à i primi dicisioni di u Tribunali Amministrativu nant'à u PADDUC. Nant'à i 40 ricorsi fatti in dui anni è mezu da cullittività, particulari è un associu, ci sò stati 19 dicisioni, 13 sò aspittati, mentri chì ci sò stati 8 disistimenti. U presidenti di l'AUE, com'ellu l'avia dighjà fatta calchì simana fà, hà vulsutu ramintà chì u TA, malgradu l'argumenti prisintati da i parti purtendu i ricorsi, hà validatu d'una manera assai larga guasgi tutti i dispusizioni di u PADDUC. Altra cuntintezza, chì hè un puntu maiò è assai sinsibuli : i 105 000 ettari d'ESA, Spazi Strategichi Agriculi, da priservà sò cunsacrati, mentri chì, a ramintemi, u tribunali hà ritinutu un sbagliu di prucedura inde l'inchiesta publica, ciò chì hà avutu com'è cunsiquenza d'annulà a cartugrafia di l'ESA. Infini, i cundizioni d'elaburazioni di i ducumenti d'urbanisimu ùn sò micca mudificati, ciò chì inghjenna dunqua nisun cambiamentu pà i cumuni chì mettini in ballu o cambiani i so PLU. S'è pà Ghjuvanni Biancucci, u PADDUC si vedi rinfurzatu oghji, ci hà da vulè oramai à arricchiscia è à sviluppà a rilazioni cù i cumuni è l'intercumunalità, firmà in cunfurmità cù l'ingaghjamenti chì sò stati presi, ma dinò è soprattuttu difenda è rispittà u ducumentu nant'à u fondu è a forma.
Eccu l'intervista di u presidenti di l'AUE.
