Lutte contre la fraude : le travail du parquet d'Ajaccio
(A redazzioni d'Alta Frequenza) - U CODAF! Ùn hè micca troppu cunnisciutu, ma u duvaria essa parchì si tratta tuttu simpliciamenti di u Cumitatu uperaziunali dipartimintali contr'à l'arrubecci. Direttu da u prifettu di Corsica è u Prucuratori di a Republica, ssu cumitatu t'hà com'è scopu di truvà l'arrubecci, è tutti i servizi di u Statu o guasgi ci sò aduniti. Pulizza, gendarmeria, dugani, finanzi publichi, DIRECCTE, urganisimi suciali, Pôle Emploi, travaghjani tutti ind'u listessu sensu contr'à l'arrubecci pocu impremi induv'elli si piattani. 2014 hè stata, si pò dì, un'annata bona pà i cuntrullori parchì dui millioni trè centu mila auri d'arrubecci sò stati custatati, guasgi trè volti di più cà l'annu scorsu. I cresciti sò spittacularii à u nivellu di i prestazioni suciali : 800 000 auri sò stati trovi, vali à dì quattru volti di più cà l'annu 2013. Pinsioni d'invalidità, CMU, fatturazioni abusivi, Pôle Emploi, l'arrubecci sò crisciuti di manera impurtanti. L'infrazzioni liati à u travaghju micca legali ani splusati dinò elli, sò stati multiplicati pà 6 trà u 2013 è u 2014. A spartera di l'arrubecci pà settori d'attività hè assai chjara : u BTP hè u più forti; raprisenta cù l'hôtels è a risturazioni i trè quarti di l'arrubecci custatati. Valérie Tavernier, prucuratori aghjuntu di a Republica d'Aiacciu, hè in carica in particulari di a lotta contr'à u travaghju piattatu è l'arrubecci frà altri. S'è certi parlani, par asempiu pà ciò chì tocca u settori di l'immubiliari, di certi partichi chì dipendini di un "prucedimentu maffiosu", ss'ultima ùn avaria micca annant'à u so scagnu cartulari di ssu gennaru.
Steti à senta à Valérie Tavernier.
