Le site de Ficaghjola à Bastia sécurisé
(A redazzioni d’Alta Frequenza) - Ùn hè più pussibuli par avà d’andà fin’è u lavatoghju di Ficaghjola in Bastia. Iss’intardizzioni chì tocca unu di i simbuli di a cità veni da un arrestu prifetturali. In fatti, a prifettura, dopu à un asamini di a rocca chì dumineghja u lavatoghju hà trovu calchì spaccatura. Issi spaccaturi sò assai prufondi da fà nascia u timori di una falata di a parti superiori di a rocca. Oghji chì hè oghji, u situ hè securizatu, grazia à sarrendi. Una suluzioni chì ùn pò micca essa difinitiva, postu chì aldilà di privà i bastiacci di l’accessu à issu locu emblematicu di u fronti di mari, piazzi di parking sò cundannati, ciò chì inghjenna prublemi di staziunamentu frà altru pà quilli chì vani à a piaghja. Da arrigulà tuttu què u più à lestra, ci sarà una riunioni marti chì veni à 2 ori. Quissa quì, chì si tinarà in casa cumuna di Bastia, adunisciarà tutti i servizii di u Statu è a Cullettività Tarrituriali di Corsica.
