Le conseil général de Haute-Corse en accord avec le redécoupage cantonal
(A redazzioni d'Alta Frequenza) - Certi spiriti schirzosi diciarani ch'ellu si rispira micca forsa u listessu aria chì omu sighi da un cantu di a foci di Vizzavona o da l'altra, ma in tutti i casi, a nova urganisazioni cantunali dimostra una vera diffarenza trà a Corsica Suttana è a Corsica Suprana. S'è in Corsica Suttana, a nova carta cantunali hè stata righjittata cù una maghjurità tremenda da i cunsighjeri ghjinirali, quissa quì hè stata validata in Corsica Suprana, ancu s'è l'avisi sò solu cunsultativi, cù 21 cunsighjeri ghjinirali nant'à 30, cinqui avendu vutatu contru, tutti di u gruppu di diritta, trè ùn avendu micca participatu è un essendu statu assenti. Malgradu tuttu, intarvinzioni ind'u sensu negativu, o à u minimu spiechendu un votu pusitivu par essa fidu à u presidenti di u cunsighju ghjinirali, Joseph Castelli, di più cà pà un sintimu cunvintu prufondu, sò stati da nutà. I dui cantoni chì ani fattu nascia u più a pulemica, à mezu à i quindeci novi chì rimpiazzarani i trenta anzianu, sò stati quilli di Merusaglia, chì hà da integrà 55 cumuni di cinqui cantoni sfarenti, è di A Ghisunaccia par via chì Ghisoni, Lugu di Nzza è Poghju di Nazza ùn sò micca integrati. Certi eletti ani ancu minacciatu di fà un ricorsu davanti u cunsighju di statu, aldilà di i mudificazioni chì pudarani essa arricati.
Steti à senta à Alain Rousseau, u prifettu di Corsica Suprana chì prisintava ssa nova urganisazioni.
