Large victoire du STC lors des élections dans les TPE en Corse
(A redazzioni d'Alta Frequenza) - U STC hà vintu l'alizzioni inde l'intrapresi assai chjuchi 2016 in Corsica ! I risultati sò stati publicati ssu vennari. In fatti nant'à l'isula, chì t'avia più di 29 000 scritti pà più di 2700 parsoni chì ani vutatu è guasgi u listessu numaru di voti sprimati, vali à dì un nivellu di participazioni à 9,40%, u sindicatu naziunalistu hà racoltu 1405 voti, vali à dì 52,13%. A CGT hè siconda assai luntanu cù 604 voti è 22,41%, davanti à FO è i so 248 voti pà 9,20%, a CFDT cù i so 155 voti è 5,75% è l'UNSA cù 125 voti è 4,64%, eppo una quindecina d'altri urganisazioni chì francani o micca 1%. In tarmini di spartera in a cumissioni paritaria interregiunali, u STC duvaria cuntà 6 sedii, a CGT 3 è FO 1. Una billissima vittoria pà u STC chì doppia u so risultatu di pettu à l'alizzioni di u 2012. Da rimarcà chì à u naziunali, s'hè arrighjistratu 7,35% di participazioni è chì hè a CGT chì racogli u più voti cù 25,12%, mentri chì u STC hà racoltu 3472 voti, vali à dì 1,07%.
Sur le même sujet
