Hôpital de Bastia : un fonctionnement dégradé mais sans conséquence sur les patients suite à l'application de la loi RIST

Un funziunamentu à a malavia ùn devi lacà suppona ch’iddi sò à a malavia curi è midicaturi. Eccu u missaghju ch’iddu hà vulsutu mandà marti dopu meziornu Christophe Arnould, u dirittori llu spidali di Bastia, à torru à parichji medichi.
Dipoi luni à sera, criscia u pinseri : in una inchiesta di Corse Matin, erani mintuvati una nota di sirviziu è parichji tistimugnanzi di sindicalisti è medichi, impinsiriti da i cunsiquenzi di a missa in anda di a legi RIST.

Issa legi teni di manera strinta a misata di i rimpiazzanti à 1 350 auri à u più pà ugni guardia, ma hè causa di pinsera in i spidala.

À senta ni u dirittori llu spidali di Bastia, gramazia à un gistimentu strintu di i spartitempa, a sola cunsiquenza diretta d’issa legi hè a chjuditura di sei letta à nantu à diciottu in cura cuntinuva. Quissa hè a cunsiquenza di a sparizioni, par un tempu, di a terza guardia d’anestesista. L’unità di curi curti hè stata aghjà riaparta. Duvaria essa cusì sinu à a fini di u mesi, cù una incirtezza pà a duminicata di Pasqua.

À senta ni sempri u dirittori llu spidali, nisciunu di i malati ùn sarà à mala furtuna.

Steti à senta à Christophe Arnould.

U cartulari llu trattamentu di l’accidenti vascularii ciribrali hà impinsiritu ancu iddu à parichji parsoni.

In issa nota di sirviziu, si trattaria di trasfirì in cuntinenti i parsoni tocchi da certi catigurii d’AVC.

À issu liveddu dinò, sò stati beddi chjari i medichi : ùn si scanta a pussibilità di trasfirì una parsona tocca da un AVC emuragicu, senza metta la in piriculu.

L’AVC ischemichi parvia d’un’arteria tappata, chì dumandani una intarvinzioni rapida, ani da essa trattati sempri supr’à locu.

Dipoi un annu, issi AVC prufittani d’un trattamentu midduratu à u spidali di Bastia : poni essa dirittamenti uparati chivi da un medicu spicialistu in neuroradiulugia intarvinziunali.

Quattru medichi, unu à tempu pienu è trè altri mandati una sittimana à mesi da i spidala di Bordeaux, Tulusa è Marseglia, sò capaci à uparà supr’à locu issi AVC ischemichi, è ani da cuntinuvà à fà la.

Steti à senta u duttori Basile Kerleroux, medicu neuroradiulogu à u spidali nordu di Marseglia, staccatu una sittimana à mesi in Bastia.

I medichi prisenti ani vulsutu rilativizà l’effetti d’issa legi RIST, in unu spidali chì sinu ad avali, t’avia vinti impiechi à tempu pienu in rimpiazzamentu.

U duttori è chirurgicu Joseph Lucciardi, prisidenti lla cumissioni di stabilimentu, ùn la nega chì u spidali di Bastia, com’è tanti altri, teni à u pil’di ghjattu par ciò chì tocca à u parsunali. Ma a li faci quantunca à ricrutà dirittamenti i rimpiazzanti, chì quissa a permetti a legi nova.
Steti à senta u duttori Lucciardi.