Football (Ligue 2) - L'ACA ramène la victoire de Quevilly-Rouen (0-1)
Touzghar pour l'ACA (photo AC Aiacciu)
L’AC Aiacciu si n’hè mossu in Quevilly-Rouen, à ghjucà u so sicondu scontru llu campiunatu di siconda divisioni.
À l’entra di a partita, sò stati l’aiaccini à piddà a suprana, ma uccasioni di marcà ùn ci n’hè statu.
Par disgrazia, Stephen Quemper, u difindidori russu è biancu, si hà lacatu prestu u tarrenu, issendu fertu.
Longu à issa prima parti, l’aiaccini sò stati attenti à ùn lacà si piddà à u sumbrettu, com’è a sittimana passata in Timizzolu.
Tocchi i 33 minuti di ghjocu, Riad Nouri mittia un calciu di pinalità in a cabbia di… Benjamin Leroy, fendu passà a so squadra davanti.
Dopu à issu marcu, l’ACA si hè impignatu à ammaistrà u scontru, senza tantu essa missu in piriculu da i nurmandi. Ghjuntu u posu, i corsi tiniani issu marcu di 1 à 0.
Ghjunta a siconda parti llu scontru, è passata l’ora di ghjocu, Vincent Marchetti pirdia a biscica à l’entra di l’arghja di riparu : hè tocca tandu à Mathieu Michel à dà si di rimenu, da ch’iddi ùn voltini à marcu pattu i lucali.
Circhendu à difenda bè, l’ACA ùn hè statu tantu dannatu da Quevilly-Rouen, cacciata un’azzioni piriculosa in u tempu aghjustatu.
Cù issa prima vittoria, l’ACA hè in a parti suprana lla classifica, cù quattru punti.
U prossimu scontru hè privistu da quì à novi ghjorna in Timizzolu, contru à Bordeaux.
