Football (Ligue 1) - Un hold-up au bout de l'ennui pour le SC Bastia face à Bordeaux (1-0)
(A redazzioni d'Alta Frequenza) - Malgradu un ghjocu povaru, u SC Bastia ci l'hà fatta infini à vincia 1-0 contr'à Bordeaux pà a sedicesima ghjurnata di Liga 1. In fatti, i sustenidori prisenti in Armand Cesari avarani campatu un veru calvariu duranti u prima tempu, postu chì mancu una squadra hà pruduttu un ghjocu cuerenti è lindu. In più di un fondu di ghjocu à u nivellu zeru, u Sporting hè statu assai debbuli cù perditi di ballò numarosi è indegni di ghjucadori prufiziunali, lachendu pussibilità impurtanti à visitori micca troppu ispirati ancu di grazia anch'elli. Dopu a pausa, i bastiacci ani fattu illusioni calchì minuta prima di vultà in daretu, cù rilanci micca sicuri, passi pà nimu o ballò in prufundezza di una manera sistematica annant'à un Brandao chì ùn pudia micca accelerà è chì hè surtitu appena dopu à l'ora di ghjocu, zifulatu da un Furiani appena biotu è annarbatu da a so squadra. L'ultimu quartu d'ora avarà dimustratu dui squadri à straziera, senza avè mancu u nivellu di a siconda parti di a classifica di a Liga 2, u mumentu di u troppu. Ma infini, à l'88ima, Raspentino hà apprufittatu di un gattivu sgaghjamentu di Bordeaux pà dà u vantaghju difinitivu à Bastia cù un tiru ind'i gabbii bioti. S'è da un puntu di vista ballò, c'hè torna assai travaghju à fà pà i ghjucadori di Ghislain Printant, u risultatu hè quì è parmetti à u Sporting di tena u so puntu in più di pettu à a zona rossa.
Steti à senta à Ghislain Printant, l'intrenori bastiacciu.
Sur le même sujet
