Football (Ligue 1) - Ouverture épicée pour le SC Bastia face à l'Olympique de Marseille
(A redazzioni d'Alta Frequenza) - Ani da cumincià l'affari serii ! Stasera à 9 ori, hè un Furiani assai impazienti è bullenti chì hà da ritruvà i so turchini in cumpetizioni dopu à dui mesi è mezu di biotu. È pà una prima ghjurnata, i bastiacci sarani upposti subbitu à un pizzonu, postu ch'elli ricevini una squadra di più in più mediatizata, l'Olympique di Marseghja new look purtatu da u miticu Marcelo Bielsa, chì hà compiu una priparazioni chì hà datu i so frutti. S'è Marcelo Bielsa sarà pà a prima volta annant'à un bancu di Liga 1, u bancu bastiacciu sarà occupatu da un intrenori chì hà da cumincià a so carriera. Claude Makélélé ùn pudarà micca perda tempu, ci vularà à essa prisenti subbitu. È ancu s'è tutti l'attori provani à minimizà appena l'impurtanza di ssa partita, sempri particulari à u nivellu fisicu è tatticu, u fattu chì ssu primu scontru di a staghjoni sighi contr'à u nimicu intimu di u Sporting, in casa, faci chì ùn hè micca una partita com'è tutti l'altri. Una disfatta saria menu bè accittata quì cà contr'à un antru club ancu puru in principiu di campiunatu, ma una vittoria, senza esagerazioni, pudaria bè inghjinnà una storia d'amori in furia trà u publicu, a so squadra nova è u so intrenori novu. Brandao farà i so principii cù u SC Bastia, mentri chì c'hè sempri calchì dubbitu pà ciò chì tocca a titularisazioni d'Areola, chì hè forsa torna appena troppu ghjustu.
Steti à senta à Claude Makélélé.
Sur le même sujet
