Football (Ligue 1) - Le SC Bastia enfin chez soi face à l'OGC Nice
(A redazzioni d'Alta Frequenza) - Stasera (sabbatu) à 8 ori, u Sporting Club di Bastia hà da ritruvà u so stadiu Armand Cesari dopu à un esiliu difficiuli di più di dui mesi contr'à l'OGC Nizza pà unu di i derby i più caldi di a staghjoni. I più di 16 000 sustenidori di u Sporting pudarani mughjà torna pà incuragiscia a so squadra chì, essendu à tempu ind'una situazioni micca gravissima quantunqua, t'avarà bisognu di buscà si i trè punti contr'à i nizzardi. Visitori chì ghjunghjarani appena indebbuliti in Bastia, frà altru cù l'assenza di u so attaccanti maestru Dario Cvitanich, un bonu affari di pettu à a bella forma di i nizzardi in issu mumentu. Pà fà u più bellu rigalu pussibuli à i so sustenidori è fà la finita cù un sintimu pessimu dipoi parechji settimani, i bastiacci pudarani cuntà nant'à un gruppu cumplettu fora di Cahuzac, sempri feritu à a spalla, Inkoo, qualificatu infini, rimpiazzendu à Angoula. Da nutà chì pà issa partita, calchì misura hè stata presa da a prifittura è u club. Prima, i circulazioni di i vitturi è di i ghjenti sarà pruibita trà 5 ori è 45 è 6 ori è 30 davanti à a tribuna Nord di u stadiu Armand Cesari pà securizà a ghjunta di u bus di i nizzardi, forzi di l'ordini essendu prisenti nant'à u parking di u fast food Quick. Pà issu scontru, l'intrata di i sustenidori in Tribuna Est si farà di eccezziunalmenti pà l'intrata ditta est-sud. Infini, è valarà pà ogni partita, l'intrata in tribuna sud si farà pà trè porti, a porta cintrali essendu risirvata à i sustenidori avendu cumpratu i so bighjetti, l'abbunati duvendu entra pà i porti di manca è di diritta pà renda più linda l'intrata di u publicu in tribuna Sud.
On écoute les impressions de l'entraîneur bastiais, Frédéric Hantz.
