Football (Ligue 1) - L'ACA écrasé à Monaco (7-1)
Davanti à 600 di i so sustinitori, ch’aviani fattu u sforzu di fà u viaghju, l’AC Aiacciu hè statu à u scaccu duminica, pirdindu 7 à 1 contru à l’AS Monacu.
È ùn vali à circà a scusa di i ghjucadori ferti : in un dispusitivu à cinqui difindidori, i Russi è Bianchi erani aghjà subaccati da un 5 à 1 dopu à 35 minuti di ghjocu.
Un marcu di Diasi dopu à dui minuti è un altru di Diatta quattru minuti dopu daghjiani aghjà a misura d’issu scontru.
Youcef Belaïli, dopu à undici minuti, lacaia entra un’anghjicula di spiranza, ma l’affari avia da durà pocu.
Ben Yedder, in menu d’un quartu d’ora, mittia trè marchi par Monacu
Cù issu marcu di 5 à 1 à u posu, a missa era aghjà ditta.
In a siconda parti llu scontru, Embolo mittia dui altri marchi pà Monacu, par finiscia u scontru à 7 à 1.
Ci hè mancatu pocu chì l’ACA ùn faccia peghju chè par quiddu scontru contru à Metz di a staghjoni 1972-73 : tandu a valisgia era vultata piena di setti biscichi, è nienti ùn s’era marcatu !
Unu schiaffu di quiddi vargugnosi, chì rinvia à l’ACA in a zona di riligazioni.
Monacu oghji, di sicuru, ùn hà avutu bisognu di prigà à Santa Divota par vincia. Ma à l’ACA, s’iddu si voli mantena, li ci ani da vulè prigheri in quantità à a Madunuccia.
È forsa ch’iddu volti calchì ghjucadori fertu…
