Football - Le FC Bastia-Borgo entre ambitions et formation
(A redazzioni d'Alta Frequenza) - Sabbatu, u CA Bastia è u Borgu FC ani ufficializatu a so fusioni in un club solu, u FC Bastia Borgu. Dui clubs emblematichi di u rughjonu bastiacciu chì s’uniscini prima pà un affari di mezi, postu chì u cuntestu di u ballò mudernu faci chì i cosi diventani di più in più difficiuli pà picculi entità. Dopu, cù 1,1 millioni d’auri di bughjettu, u FCBB, chì ghjucarà in neru è rossu, t’hà com’è ambizioni di ricullà in furia in Naziunali 1, da induv’ellu veni l’anzianu CAB, cù una squadra di Naziunali 2 chì sarà intrenata da l’anzianu intrenori di u Parighji FC Christophe Taine, è chì sarà cumposta di cinqui anziani ghjucadori di u CAB, di ghjucadori di u Borgu FC è d’elementi novi. Un’ambizioni arrimbata à a vulintà di ghjuvassi di i strutturi muderni di Borgu, induv’elli si ghjucarani i partiti è si farani l’intrenamenti, pà pudè dà una vera pussibilità à i ghjovani ghjucadori corsi di spannassi à un nivellu naziunali, frà altru grazia à a squadra riserva intrenata da Antoine Coque chì ghjucarà in Naziunali 3, una riserva chì sarà rinfurzata da a squadra di i menu di 19 anni. Cuncirnendu a squadra dirighjenti, José Orsini, di u Borgu FC, sarà presidenti, mentri chì Antoine Emmanuelli, pà u CAB, sarà presidenti dilegatu.
Steti à senta à José Orsini, u presidenti di u FC Bastia Borgu.
