Football (Coupe de France) - Le CA Bastia se qualifie, l'AJ Biguglia éliminé
(A redazzioni d'Alta Frequenza) - Dui di i trè partiti di u settesimu ghjiru di Cuppa di Francia cuncirnendu clubs corsi sò stati ghjucati ssu sabbatu. Prima, u CA Bastia, furmazioni di Lega 2, s'hè qualificatu straziendu contr'à Plouvorn, parchì dopu avè presu una reta à a dicesima minuta nant'à u tarrenu brittonu, i cabisti ani egualizatu solu à a 68a minuta grazia à Le Mat. Sò stati ubligati à andà in prulungazioni, u risultatu firmendu à 1-1, è ancu fin'è i penaltys pà andà à buscà cù difficultà a so qualificazioni 5 penaltys à 4. Pà l'AJ Biguglia, club di divisioni d'unori, hè a fin di l'epupea, par via di una disfatta 1-0 contr'à l'AS Cannes, squadra di CFA, cù una reta di Zobiri à a dicesima minuta. I ghjucadori di Biguglia poni essa fieri d'elli malgradu tuttu, postu ch'elli sò stati parechji volti periculosi è sò stati assai bè urganizati. I rigretti erani numarosi, soprattuttu chì à a meza ora di ghjocu, Nanouche, i visitori pariani avè u listessu parè dopu à a partita, avendu scrittu una reta chì ùn hè micca stata validata, l'arbitru nant'à u latu ghjudichendu chì u ballò ùn avia micca francatu a ligna. Ssa dumenica, L'Isula, club di CFA 2, andarà in Saint Etienne la Métare, club di dicesima divisioni è u più chjucu di ssu settesimu ghjiru, à 2 ori.
