Cour des Comptes : des accusations mal perçues
(A redazzioni d'Alta Frequenza) - Splusivu. Ùn c'hè nisun altra parolla più forti pà qualificà u riferitu di a Corti di i Conti, publicatu ssu luni da ss'ultima, chì faci una critica putenti di a gistioni di l'impositu è di i regimi fiscali dirugatorii in Corsica, una Corsica chì saria, quandu omu leghji ssu riferitu, a campiona di i derugazioni è di i cumbriculi fiscali. In ssu riferitu, Didier Migaud, u prima presideni di a Corti di i Conti, amenta "pratichi chì s'arrembani à dispusizioni trapassati, o ancu senza mancu fundamentu legali, cuntrarii à u principiu generali d'ugualità davanti à l'impositu" è di "prublemi chì cuntinueghjani nant'à a gistioni di l'impositu in ssa regioni". I regimi derugatorii fariani perda di fattu à u Statu 78 millioni d'auri sicondu u riferitu, è a Corti "stima nicissariu di rimetta in causa pratichi è dispusizioni cuntrarii à i principiu di legalità è d'ugualità davanti à l'impositu, è l'appiecazioni senza dibulezza, da i servizi scuncintrati di u Statu, di l'insemi di i reguli è pruceduri fiscali privisti da a legi". Ssu riferitu aciarbu cuncerna par asempiu i tassi nant'à u tabaccu è l'alcool, eppo a fiscalità di l'intrapresi. Pà Ghjuvan Guidu Talamoni, una fiscalità particulari à a Corsica hè propiu ghjustificata è si devi ritruvà in u quadru di un statutu fiscali è suciali veru di l'isula ; l'Assemblea di Corsica s'hè ingaghjata in ssa riflessioni quì.
Steti à senta à Ghjuvan Guidu Talamoni.
