Corse : le message très politique du préfet de région
(A redazzioni d'Alta Frequenza) - "Ristabiliscia a verità è luttà contr'à certi idei falsi in cuntinenti ma dinò in Corsica" ! Eccu u scopu di a cunfarenza di stampa di riintrata urganizata ssu marcuri da u prifettu, chì hà amintatu parechji sughjetti com'è a cartula di l'impiegu lucali, i fochi, l'urbanisimu è l'accunciamentu di u tarritoriu, i rumenzuli, i mezi di u Statu pà i cullittività lucali o ancu a Xylella Fastidiosa ; ci vultaremi di manera più larga. Inde u so introitu, Bernard Schmeltz hà dunqua dinunziatu ciò ch'ellu qualificheghja di "certi idei falsi", chì fiuriscini frà altru nant'à i reti suciali, chì dariani una maghjina gattiva di a Corsica da l'altra parti di u Mediterraniu, ma dinò altri chì mittariani in causa nant'à l'isula u Statu è a so azzioni, eppo ancu u restu di i francesi, d'appressu à ellu. U prifettu di Corsica hà vulsutu ramintà di fatti par asempiu "ch'ellu ùn c'era micca un Statu culuniali in Corsica", "ch'ella ùn asisti micca una ghjustizia pulitica", "ùn c'hè nè una guerra, nè un raportu di forza trà a Corsica è u Statu", "ùn asisti mancu una ghjustificazioni pà passà pà a viulenza", o ancu chì "semi in un Statu di dirittu è ch'ellu ci voli ch'ella passessi a ghjustizia". Pà Bernard Schmeltz, u rollu di u Statu nant'à l'isula ùn hè micca egemonicu, ma bè arrimbatu à una rilazioni partinariali è neutra cù i sfarenti eletti pà pudè travaghjà inde l'intaressu generali. Un discorsu chì, s'ellu hè calmu, hè dinò siveru è assai puliticu ; a situazioni attuali di a Corsica ghjustificheghja un missaghju d'un culori simuli ?
Steti à senta à Bernard Schmeltz, u prifettu di Corsica.
Sur le même sujet
