Coronavirus : les mesures d'Air Corsica
Air Corsica, chì avia aghjà dittu ch’ùn si daria più à manghjà à bordu, faci cunnoscia i misuri ch’idd’hà presu pà i so voli :
- Sarani missi in ugni avviò dutazioni sanitarii (mascari, guanti, liquidi idroalcolichi) da pudè si cunfruntà à situazioni d’urgenza.
- Biendi è manghjera ùn ci ni sarà più, in i voli trà Corsica è francia. L’ughjittivu hè di limità cussì i cuntatti di vicinanza trà passaghjeri è parsunala.
- À ugni volu, sarani rinfurzati i pruciduri di pulizia è disinfizzioni di i cabini.
In casu ch’idda sichi cunfirmata a prisenza d’una parsona cuntaminata mentri un volu, una disinfizzioni apprufundita di l’avviò si farà, via un accordu cù una sucità spicializata.
Ugni ghjornu, una cellula interna di a cumpagnia si riunisci, da fà u puntu di l’infurmazioni di primura, o ancu da dicida s’iddi si devini piddà misuri novi sicondu i cambiamenti lla situazioni.
Ramenta a cumpagnia chì l’aria cundiziunata in l’AIRBUS è l’ATR d’Air Corsica hè rinuvata è purificata dopu à trè minuti, è cusì risicu di trasmissioni rifiatendu ùn ci n’hè.
Pà u più, a cuntaminazioni si faci cù u cuntattu. Pò ancu succeda via vapurisazioni, ma unicamentu issendu à torru à calchissia un beddu mumentu.
Oramai, a cità d’Aiacciu hè un puntu di circulazioni – dicini un « cluster » ! -di u siscu dittu coronavirus / Covid 19.
Sò vintitrè i parsoni à essa stati cuntrullati pusitivi. I stabilimenti sculari, di prima zitiddina, i loca chì accoddini publicu è ghjovani ani da essa chjusi 14 ghjorna.
À i studianti scularizati in Corti, ma chì stani in Aiacciu, li si dumanda d’ùn andà ci, in facultà.
Ùn sarani mantinuti micca l’evenimenti chì francariani i 50 parsoni in loca chjusi.
Sur le même sujet
