Conseil municipal d'Ajaccio : la condamnation de la violence en débat

Ghjovi, ci hè stata una riunioni di u cunsigliu municipali d’Aiacciu.
Quattru ghjorna dopu à l’attintatu chì hà toccu a casa di Simone Guerrini, à nantu à a strada lli Sanguinarii, i dibattiti sò stati quiddi di a cundannazioni d’iss’attu.

A maiurità municipali hà prisintatu una muzioni, chì ùn hè stata spartuta da l’eletti naziunalisti.

Tandu, Stéphane Sbraggia n’hà dinunciatu l’incirtezza è l’ambiguità chì participighjani, à senta ad iddu, d’una certa cunfusioni, è ancu d’un certu malasgiu.
L’eletti naziunalisti, iddi, ani spiicatu a so scelta.

« Ùn semu di i prufiziunali di i cumunicati d’indignazioni senza lindumani, chì mai ùn ani purtatu suluzioni pulitichi di fundu », hà dittu Jean-Michel Simon à nomu di Corsica Libara.

Po’ hà aghjustatu : « u cuntestu inturbiditu chì ugnunu pò veda apri a porta à pruvucazioni è altri manipulazioni, è à logichi di cunfrontu chì no’ ùn pudemu cauziunà. In cunsiquenza, ripitimu chì sola una dimarchja pulitica cuirenti, strutturata à parta si da a difesa è a ricunniscenza di i dritti di u populu corsu, hè in capacità di trattà i mali chì toccani a Corsica chì sò anni è anni, è di purtà a paci à nantu à a noscia tarra ».

Corsica Libara pensa ancu chì a rispunsabilità di u pighjurà di a situazioni veni da i blucchimi di u statu francesu è da a incunsiquenza di i rispunsevuli pulitichi attualmenti in carica di l’affari lla Corsica ».

Jean-François Casalta, par contu soiu, hà dittu chì ghjuvà si di a parolla « cundannà » era un « falsu prublema » postu da certi « com’è u filu di a spartera trà bè è mali ».
« Ùn n’avemu nienti à chì fà di i prucessi in semantica », hà dittu l’elettu, pricisendu ch’iddu cuntinuvighja à milità pà un’azzioni publica unicamenti.

Jean-André Miniconi hà dittu chì a parolla « cundannà », era u tarritoriu di a ghjustizia. Hà bramatu ch’iddu s’allarghi u dibattitu sinu à fatti chì devini pona a quistioni di u « mudellu di sucità chì no’ semu in traccia di prupona ».

Hà ancu parlatu di quiddi pochi chì s’arricchiscini prestu, di u turismu di massa è di lucazioni privati.