CAB : une conférence des acteurs économiques entre un mur de la dette à affronter et un PTIC incertain
Marti, uni pochi d’attori ecunomichi lla cumunità d’agglumirazioni bastiaccia ani fattu una cunfarenza di stampa.
Pà certi sittori, a ripresa ecunomica ci saria, è par certi altri saria menu impurtanti.
Ani da essa parichji i impresi à pittughjà si à i debiti.
I rimbursamenti lli debiti fiscali è suciali, è quiddi lli PGE cuncessi mentri a crisa attaccarani toccu ghjinnaghju.
In Corsica, à i impresi, l’hà da tuccà à rimbursà 1,1 miliardu di PGE in quattr’anni, è 300 miliona di debiti fiscali è suciali in un annu.
Alex Vinci Guerra, u prisidenti di l’ADEC, dici chì un terzu d’issi impresi pudaria francà issu passu senza troppi difficultà. Pà un altru terzu, l’affari pudaria essa più dilicatu. Pà l’ultimu terzu infini, u risicu pudaria essa più grevu, masimu chì a ripresa d’attività ùn hè stata cusì bona.
Steti à senta à Alex Vinciguerra, u prisidenti di l’ADEC.
In a cumunità d’agglumirazioni bastiaccia, sò privisti dispusitivi cù l’ADEC, a CCI è a Camara lli Mistiera, da sustena a dinamica di i impresi.
Toccu u primu di ghjinnaghju, trè miliona d’auri sarani dispunivuli pà i cinqui cumuni lla CAB, da cofinanzà ciò chì ferma di certi uparazioni.
Eppuri, s’affacca un pinseri pà u finanzamentu lli PTIC.
L’ultimi discursati cù i sirvizia llu statu portani à pinsà chì u finanzamentu calaria bè par certi prughjetta, parvia di a spartera di i 500 miliona lli PTIC trà a CdC, i cumuni è l’intercumunalità.
Vali à dì chì u statu, chì avia dighjà francatu bè i finanzamenta privisti, hà da riducia i so ingagiamenti, mittindu in piriculu certi prughjetta.
Steti à senta à Louis Pozzo di Borgo, u prisidenti lla CAB
