Bastia : la préfecture fait une mise au point avant le rassemblement au mot d'ordre Racailles Fora de Paese Novu
Sabbatu, à un’ora è mezu, hè privista un’accolta à u city-stade di Paese No’, in Bastia, da risponda à a chjama « Racailles Fora ».
Issa chjama, iniziata via Snapchat, ùn n’hà urganisatori ufficiali, ed hè sustinuta è ripresa unicamenti da muvimenti di strema dritta, com’è u partitu Reconquête o l’associu Palatinu.
Ramintemu ch’issa chjama saria una risposta à u intoppu successu trà parichji ghjovani, di notti trà vennari è sabbatu, à nantu à un staziunamentu d’un centru cumirciali di Furiani.
Quattru ghjovani – cuntendu à quiddu chì si hè dittu vittima d’un’aggrissioni in parichji è chì hè sustinutu da iss’accolta – ani da essa ghjudicati u dodici di frivaghju à mutivu di viulenzi vulintarii.
Via un cumunicatu, dici a prifittura llu Cismonti ch’issa « manifistazioni ùn issendu stata dichjarata in prifittura, è fendu si senza urganisatori ufficiali, ùn ci n’hè basa rigulamintaria da impidì la di manera furmali.
Eppuri, da parà ugni scumportu o disturbu à l’ordini publicu, un dispusitivu di sicurità sarà missu in anda da i forzi di l’ordini.
In issu quadru, u minimu attu di viulenza o mancamentu à a legi hà da essa cuntrullatu à veru, è presu in contu via un trattamentu beddu à prupiziu.
Hè ramintatu chì purtà à l’odiu o à a viulenza contru à una parsona o un gruppu di parsoni, cù u neci di a so urigina, di a so appartinanza o non appartinanza, vera o supposta, à un’etnia, una nazioni, una pratesa razza o una riligioni pricisa, hè un dilittu chì pò custà sinu à un annu di prighjunia è 45 000€ d’amenda.
A veda ni u carattaru udiosu è razzistu di certi publicazioni spartuti via i reti suciali, u prifettu llu Cismonti ni chjama à u calmu, signalendu a nicissità di lacà travaddà a ghjustizia ».
Sur le même sujet
