Avenir du GIRTEC : Maria Guidicelli répond à Marie-Jeanne Fedi
(A redazzioni d'Alta Frequenza) - Seenza publica nova di l’Assemblea di Corsica oghji è dumani (ghjovi è vennari). Prima di studià par asempiu u Contu Amministrativu è u Contu di Gistioni 2014 di a Cullittività tarrituriali di Corsica, c'erani i famosi dumandi urali. C'era in u prugramma par asempiu i trasporti marittimi, a situazioni di l’insignanti di a scola di i Prunelli di Fium’Orbu o ancu una dumanda annant’à l’avvena di u gruppamentu d’intaressu publicu pà a ricustituzioni di i tituli di pruprietà in Corsica (GIRTEC). Ss'ultima intarrugazioni hè stata posta da Marie Jeanne Fedi, à nomu di l'eletti Cumunisti è Citadini di u Fronti di Manca à l'Esecutivu. Postu ch'ella s'avvicina a fini di i deci anni di durata privista di a missioni di u GIRTEC, com'è a fini di i so finanziamenti scritti inde u Pianu Eccezziunali d'Investimentu, ss'arnesi essenziali ùn avarà più i mezi di viaghjà, sicondu a cunsighjera tarrituriali. L'inchietudini annant'à l'avvena di a struttrura ricollani, à tal puntu chì duranti a so assemblea generali, un puntu pà i disimpieghi hè statu privistu in u so bughjettu. Hè Maria Guidicelli chì hà riposta à a dumanda di l'eletta Cumunisti è Citadini di u Fronti di Manca. S'è tutti l'attori cuncirnati sò d'accunsentu pà dì chì a missioni di u GIRTEC devi essa prulungata, nisun suluzioni vera hè stata pruposta da u Statu, fora di una lettara di u prifettu di u 10 di ghjunghju, ma chì ùn dà nisun lisibilità à mezu è longu andà, hà accertatu a cunsighjera esecutiva chì ùn perdi micca a spera di veda i cosi cambià.
Steti à senta à Maria Guidicelli.
Sur le même sujet
