Annonces d'Emmanuel Macron sur la Corse : les réactions

« Semu à un mumentu storicu. U spiritu di rispunsabilità è u sensu di u duveri chì vo’ aveti avutu c’impidiscini a indiffarenza è u statu quò ». Eccu i parolli ditti ghjovi à l’assemblea corsa da emmanuel macron, u prisidenti lla ripublica francesa.

« U statu quò saria u nosciu fiascu à tutti » hà ancu dittu emmanuel macron in u so discorsu. Hà dittu u prisidenti francesu chì « a Corsica t’avia bisognu dipiù di libartà è di a ricunniscenza di a so singularità. Par quissa, tocca à fà entra a Corsica in a noscia custituzioni, via un articulu ineditu ».

Di manera più cuncreta, emmanuel macron hà spiicatu ch’iddu vulia dà à l’assemblea di Corsica a pussibilità d’adattà meddu i normi. Un drittu d’adattazioni ch’iddu ci hà da vulè à simplicificà, da sfrancà si la da i blucchimi.

Ci hà da vulè ancu à studià a pussibilità di difinì a norma pà i cumpitenzi trasfiriti, ma via u cuntrollu di u cunsigliu di statu : un’autunumia, ma forsa micca lighjislativa. Longu à issi sei mesa dunqua, ci hà da vulè à purtà u dibattitu à nantu à issu tema di primura di a rivindicazioni naziunalista.

In a so riazzioni, hà dittu Jean-Félix Acquaviva chì i parolli di u prisidenti erani un beddu principià, ma supr’à tuttu ch’iddi t’aviani una purtata pulitica.
Ben’intesa, tutti i porti ùn sò stati aparti, è mancani i parolli impurtanti in issu discorsu. Ma oghji, si poni cunsidarà tutti i pussibilità, chì di a singularità di a Corsica si n’hè parlatu, è ancu di a pussibilità d’un puteri nurmativu.
Steti à senta u diputatu lla siconda circuscrizzioni llu Cismonti.

Hè bedda capita chì pà Laurent Marcangeli, u discorsu d’emmanuel macron t’hà un carattaru storicu è apri à un cumprumissu, chì pudaria essa storicu ancu iddu.

Oghji, ugnunu devi travaddà da prupona un scrittu capaci à fà la finita cù i logichi di cunflittu è di suspettu trà a Corsica è u statu.

Steti à senta u diputatu lla prima circuscrizzioni llu Pumonti.

Jean-Christophe Angelini, u prisidenti di u gruppu Avanzemu, hà dittu ch’iddu era à tempu sudesfu è cautu.
Sudesfu d’issu discorsu à purtata pulitica, è cautu pà u cuntinutu di l’articulu à vena di a Corsica in a custituzioni.

Certi parolli ch’ùn sò stati ditti aprini a porta à u dialugu, ma certi altri mancani, hà dittu Jean-Chistophe Angelini chì no’ stemu à senta.

U custatu hè u stessu pa Paul-Félix Benedetti di Cori in Fronti, chì spera quantunca ch’iddi sarani di i più custruttivi, i sei mesa à vena.
Steti à senta l’elettu di Cori in Fronti.

Cunsidarendu da non evenimentu a ghjunta d’emmanuel macron, Corsica Libara ùn c’era à l’assemblea ghjovi.

Pà Josepha Giacometti, d’issu non evenimentu, ci n’hè statu cunfirma cù i parolli di u capistatu francesu, chì si hè cuntintatu di sbucinà un discorsu senza cuntinutu veru.

Steti la à senta.