2ème tour des municipales en Corse: communiqué de Corsica Libera
(A redazzioni d'Alta Frequenza) - Corsica Libera hà prisintatu stamani (marcuri), in un cumunicatu, a so analisi di a situazioni pulitica in Corsica dopu à u primu ghjiru di l’alizzioni municipali. U muvimentu rigretta chì in Bastia è Portivechju i leader di i listi Femu a Corsica avissini accittatu d’essa d’accunsentu cù una dimarchja d’ostracismu contr’à u currenti indipendentistu. Cita dinò l’asempii di una nova dimarchja pulitica d’apartura cù Jean Charles Orsucci in Bunifaziu par asempiu è dici chì in Aiacciu Simon Renucci è i so partinarii cumunisti aviani accittatu un dialogu senza cundizioni. Corsica Libera dici chì i novi partinarii di Femu a Corsica sò ghjustu appuntu quilli chì s’upponini u più à l’idei naziunalisti ; riforma in corsu, ufficialità di a lingua, statutu di residenti, vali à dì l’UMP, a manca republicana è u fronti di manca. Corsica Libera chjama à vutà pà i listi cù nentru militanti di Corsica Libera pà u sicondu ghjiru. Un'argumentazioni sviluppata largamenti dinò ind'un cumunicatu publicatu da Michel Giraschi è U Riacquistu di Portivechju. Ss'ultimu rammenta d'altrondi chì u so partitu cuntinuarà à luttà pà ciò chì tocca a prublematica di l'acqua, u prughjettu di portu, a speculazioni immubiliari è i residenzi sicundarii, à u nivellu lucali, o ancu i grandi sughjetti ammintati più sopra è rilativi di manera più ghjinirali à l'avvena di a Corsica.
