Visite de Bernard Cazeneuve: Pierre Chaubon tient à arrondir les angles

(A redazzioni d'Alta Frequenza) - "Circulez, y a rien à voir !" Eccu com'ellu si pudaria riassuma in francesi a visita di u ministru di l'Internu, o in tutti i casi ind'a so parti cunsacrata à l'avvena istituziunali è urganisaziunali di l'isula. S'è Bernard Cazeneuve s'hè primuratu assai di i prublemi di securità è di viulenza, n'hà parlatu assai d'altrondi ind'a so unica intarvinzioni ufficiali, pari ch'ellu avissi sarratu cù viulenza a porta à u prughjettu glubali chì hè in traccia d'essa appruntatu da a raprisintazioni pulitica di l'isula. Pà ciò chì tocca a deliberazioni di sittembri di u 2013 di l'Assemblea di Corsica, u famosu "votu di i 46" annant'à a scrizzioni di a Corsica ind'a Custituzioni, u ministru hà pricisatu chì u guvernu "sarà attenti" à i pruposti di l'eletti, pà sbuccà annant'à una "discussioni senza svianzi" è un "dirittu à a sperimentazioni di i tarritorii". Malgradu tuttu, u ministru hà fattu cunnoscia calchì riserva, par ùn andà micca ver di una dimarchja di rumpitura" è tena "l'egualità di tutti i citadini'. Annant'à a lingua corsa, ci voli pà contu soiu "un'amparera più sistematica" ma hà stimatu chì a cuufficialità ind'i servizii publichi saria "nè un bè, nè pussibuli". Pà ciò chì tocca u statutu di residenti, s'è u PADDUC devi parmetta d'arrigulà certi prublemi di u fundariu, "impidiscia à certi l'accessu à a pruprietà ùn pudarà arricà u risultatu aspittatu". "Hè un'illusioni" pà u ministru chì và ancu di più luntanu ammintendu u dirittu aurupeu. Infini, à u nivellu di l'Arrestu Miot, Bernard Cazeneuve stima ch'ellu "hè pussibuli di truvà altri suluzioni" stimendu chì "i dicisioni di u Cunsighju custituziunali ùn devini micca essa cumintati ma appiecati". Pierre Chaubon, cunsidaratu suventi com'è u babbu spirituali di u grandi prughjettu di riforma, hà vulsutu arragnà appena l'affari, com'è sempri. Eppuru, hà ricunnisciutu què anch'ellu: c'hè annant'à certi cartulari caldi una pusizioni di sarratura chjara.

Steti à senta u presidenti di a Cumissioni di cumpetenzi legislativi è rigulamentarii.