Trois délibérations relatives au PADDUC adoptées par l'assemblée de Corse
(A redazzioni d'Alta Frequenza) - L’assemblea di Corsica hà aduttatu stamani (vennari) appena nanzi à dui ori trè deliberazioni annant’à u PADDUC, u famosu pianu d’accunciamentu è di sviluppu durevuli di a Corsica. 35 cunsighjeri tarrituriali ani vutatu pà u ducumentu, 6 ani vutatu contru, 4 ùn ani micca vulsutu participà à u votu è 6 erani assenti. Si tratta di u nanzi ultimu votu di u PADDUC nanzi à l’inchiesta publica, eppo un ritornu davanti à l’assemblea di Corsica pà un votu difinitivu, forsa nanzi à l’istati. S’è à u mesi d’uttrovi, u PADDUC avia racoltu 38 voti, a diritta ùn avendu micca vutatu, ùn hè micca statu u casu stavolta, induva sei membri di quissa quì ani vutatu contru. A maghjurità tarrituriali hè stata unita daretu à u ducumentu, com’è i naziunalisti chì ani vutatu pà u PADDUC, fora di Paul Félix Benedetti chì ùn hà micca vutatu. Vultaremi annant’à ssu cartulari impurtanti ind’i nostri nutiziali chì venini.
