Travaux de la place Charles de Gaulle à Ajaccio : l'avenue de Paris sera fermée à la circulation dès vendredi
Image Cità d'Aiacciu
U prughjettu di a rinuvera cumpletta di a piazza llu Diamanti è di u so staziunamentu suttarraniu n’hè ghjuntu à un altru puntu : i travadda si cuntinuvighjani, è avanzani ancu più prestu ch’idda ùn si cridia.
Par quissa, è più prestu ch’idda ùn si cridia quì dinò, i travadda ani da tuccà a strada, à nantu à a cusì ditta « avenue de Paris », chì hà da essa chjusa à a circulazioni à parta si da vennari è par quattru mesa, è ancu pà i motò d’altrondi.
Vali à dì ch’iddu ci vurrà à passà pà u bor’di mari o ancu pà u carrughju Fiorella, quiddu di u cumissariatu, chì hà da essa riapartu à a circulazioni.
Issa riapartura si hè fatta in cuurdinazioni cù i sirvizia di a prifittura è di a pulizza, parvia ghjustamenti di a prisenza llu cumissariatu.
Par andà à nantu à u viali Pascal Rossini, in u filu di u cursu Napulionu, a circulazioni in duppiu sensu si hà da fà nurmalmenti longu à u carrughju Eugène Macchini.
« I cumircianti di l’avenue de Paris sò stati infurmati capunanzi d’issa situazioni da Alexandre Farina, u primu aghjuntu, è da i sirvizia lla cità, chì sò andati à u so riscontru », hà spiicatu in un cumunicatu a cità d’Aiacciu.
