Territoriales : la victoire totale de Pè a Corsica
(A redazzioni d'Alta Frequenza) - 67 155 corsi. 56,46% di i voti. Quarantunu eletti nant’à i sissantatrè di a futura Assemblea di Corsica, vali à dì cinquantadui di i sissantatrè membri di a lista chì sarani o cunsighjeri tarrituriali, o fendu parti di u cunsighju esecutivu. Eppuru, ancu s’è i sciffri valini pocu pà discriva l’impurtanza di u ribombu inghjinnatu da u successu putentissimu di a lista Pè a Corsica, portabandera di un naziunalisimu di guvernu chì dui anni dopu a so prima vittoria eletturali, s’arradicheghja cù una forza tremenda. Un ribombu isulanu prima, postu chì i cità storicamenti di diritta com’è Aiacciu è Purtivechju ani vutatu largamenti pà i naziunalisti. Dopu, parchì i naziunalisti di Pè a Corsica ani da ghjunghja u 2 di ghjinnaghju chì veni à l’Assemblea di Corsica cù una maghjurità assuluta cunfurtevuli. Infini, parchì faci spuntà a sparizioni di parti sani di a pulitica corsa, è a trafalera d’una famighja di diritta chì hà pruvatu à risista à u timpurali Pè a Corsica, ma chì si ni sorti in pezzi. Ssu ribombu trapassa u Mediterraniu dinò, parchì hè bè nant’à u scagnu di u presidenti di a Republica, Emmanuel Macron, ch’ellu s’hà da ritruvà un cartulari corsu assai difficiuli à trattà, par via di ghjenti assai scuntenti di sicuru quì è culà. Un’alizzioni cù un’astenzioni assai forti, postu chì 111 180 alittori corsi ani sceltu d’ùn andà micca à vutà, un’astenzioni chì ci hà da vulè à pighjà in contu pà guvernà senza troppu prublemi.
Steti à senta à Gilles Simeoni.
Sur le même sujet
