Territoriales 2021 : Derniers meetings de campagne pour les quatre listes encore en lice avant le deuxième tour

Si ni ghjunghji à a fini, pà iss’alizzioni tarrituriali llu 2021.
Ghjovi, i 4 candidati ani fattu i so ultimi riunioni publichi, da circà à cunvincia sempri di più, masimu à quiddi chì ùn ani vutatu.
Gilles Simeoni, in testa llu primu ghjiru, hà parlatu un’ultima volta à i soi in Lupinu. U so discorsu, l’hà tiratu versu u suciali, parlendu di sulidarità è di puvartà. « Ùn circhemu à tacia li, issi difficultà, i fighjulemu è prupunimu una strada da francà li, in u filu storicu llu nosciu cumbattu », hà dittu u capifila di « Fà Populu Insemi ».
Laurent MarCANgeli era in Purtichju, ind’è a so siconda di lista Valérie Bozzi.
Ghjuntu sicondu duminica, è solu candidatu non naziunalistu llu sicondu ghjiru, Laurent MarCANgeli a si hè cacciata cù i so avvirsarii, è supr’à tuttu cù Gilles Simeoni, dindu chì a so sola mutivazioni era a indipindenza. U merri d’Aiacciu si hè pratesu tribulatu da una scelta à vena pà i so ziteddi dumani, cù un votu « iè » in una mani è un votu « innò » in quidd’altra, com’è in Canacchia.
« Semu risistenti » hà dittu Laurent MarCANgeli.
Jean-Christophe Angelini è i so novi alliati di Corsica Libara si sò accolti davanti à a citadella di Corti.
U capifila di « Avanzemu pà a Corsica » hà parlatu dopu à Pierre Gambini, Josepha Giacometti, Petr’Antonu Tomasi è Vannina Borromei.
Parlendu di a fusioni cù Corsica Libara, hà dittu chì tanti è tanti corsi ùn avariani capitu ch’idda fermi a divisioni. Piddendu si ni à Gille Simeoni, hà dittu chì u muvimentu chì hè sbuccatu à nantu à i vittorii llu 2015 è llu 2017 « si hè persu in l’acqui cutrati d’un calculu eguisticu ».
Paul-Félix Benedetti è i soi ani fattu a so ultima riunioni in Piazza d’Armi, in Bastia. Dopu à Henri Olmeta, Antoine Carli, Serena Battestini è Jean-Baptiste Arena, u capifila di « Cori in Fronti » si hè fattu uffinsivu bè, piddendu si ni à « i forzi llu danaru ». Hà prupostu di metta à gallu una navi nova, cù una dirizzioni altra, da ghjunghja infini à salvamentu.
I candidati poni parlà sinu à vennari à sera. Tandu sarà finita a campagna.