Retour sur le parcours d'Alain Orsoni
Vultatu in Corsica pà u intarru lla so mamma, Alain Orsoni, chì campaia à u Nicaragua chì sò parichji anni, hè statu tumbu in u so paesu di Veru.
Fatti i so studii di drittu è scenzi ecunomichi, Alain Orsoni si era ingagiatu beddu ghjovanu in pulitica, da militanti naziunalistu, in u filu di ciò ch’iddu purteti Edmond Simeoni in l’anni sittanta.
In u 1975, hè in Aleria, po’ entri à u FLNC un annu dopu.
Suspittatu d’avè participatu à un attintatu contru à imbasciata d’Iranu in u 1980, hè imprighjunatu, po’ libaratu dopu à l’annistia di u 1981.
U militantismu naziunalistu d’Alain Orsoni si cuntinuvighja cù a CCN, cù u MCA po’ cù a Cuncolta Naziunalista.
Di ghjunghju di u 1983, hè rapitu u so frateddu Guy.
Un commandò di u FLNC era statu incaricatu, un annu dopu, di tumbà in prighjoni l’omini suspittati rispunsevuli d’issu rapimentu.
Alain Orsoni avia sustinutu publicamenti l’azzioni, issendu tandu incarciaratu è cundannatu à mutivu di apulugia di criminu.
In u 1986, Alain Orsoni hè statu elettu cù u MCA à l’assemblea di Corsica.
Più tardi, dopu à parichji divisioni chì toccani a Cuncolta Naziunalista, hè di i fundatori di u MPA.
Saria statu à quidda epica unu di l’intarlucutori in i discussioni pà u statutu dittu « Joxe ».
In cori à l’anni nuvanta, veni a guerra trà i muvimenti naziunalisti.
Alain Orsoni si laca tandu a Corsica, par andà in Ispagna è in America Cintrali.
In u 2008, duventa prisidenti di l’AC Aiacciu.
Vultatu in Corsica, hè a vittima d’una prova d’assassiniu, ind’iddi sò missi in asaminu parichji parsoni.
In u 2009, hè intarpillatu in u quadru di l’assassiniu di Thierry Castola, po’ rimissu in libartà, ùn issendu ci ni provi, dopu à più di trenta ghjorna di greva lla fami.
Di sittembri di u 2025, Alain Orsoni si laca a so funzioni di prisidenti di l’AC Aiacciu, chì hè tandu à a malavia à liveddu suldarinu.
Sur le même sujet
